UN-in South Sudan buaina titawp turin ngen

United Nations Security Council chuan South Sudan rama tharum thawhna thleng chu tihtawp turin a ngen.

Thuchhuah siamin, UNSC chuan kar kalta Zirtawpni aṭanga South Sudan-a President Salva Kirr leh Vice-President Riek Machar thlawptu sipaite laka inbeihna thleng chu a dem thu a sawi a, an inbeihnaa UN hmunhma te beih tel a ni chu a lungawi lo hle tih a sawilang bawk.

Vice President thlawptu sipaite chuan President Kirr thlawptu sorkar sipaite hian an bei hmasa niin an sawi. Inrinni khan boruak hian ziaawm lam pan mah se, Pathianni khan an inkap zui leh a ni.

Tualchhung indona thleng vang hian civil mi 150 vel an thih bakah, UN compound-ah mi za tel himna zawngin an tlanchhe lut bawk.

US state department chuan South Sudan khawpui, Juba-a inbeihna thleng chu a dem thu a sawi a, department thupuangtu John Kirby chuan US embassy-a non-emergency personnel-te chu Juba chhuahsan turin a hrilh nghal a ni.