Japan inthlanah rorel lai an chak

Japan Parliament upper house inthlan, Pathianni-a neih takah chuan rorellai, Prime Minister Shinzo Abe-a party, Liberal Democratic Party (LDP) leh a thawhpuite an chak.

Inthlanah hian LDP hian simple majority chu seat khat chauhin a phak lo a, mahse ṭangrual sorkar a siampui, Komeito party chuan seat 14 zet a la ni. Komeito party hian inthlan hma khan upper house-ah member pakua chauh a nei phak a ni. PM kaihhruai ṭangrual pawl hian lower house-ah super-majority a nei bawk.

Inthlan dawn hian eptu lam chuan Abe-a economic policy, 'Abenomics' tia sawi chu PM leh a thawhpuite beihna atan hmangin chak ngei an tum a, mahse rorellai party-te chu hneh taka thlan tlin an ni ta zawk a ni. PM Abe chuan a economic policy avanga hnehna chang an ni thu sawiin, an thu tiam tawh hlen ngei tuma chak taka an thawh tur thu a sawi.

Rorellai party chu inthlanah hian chak mah se, minister pahnih Aiko Shimajiri leh Mitshuhide Iwaki-te erawh an tling zo lo. Abe chuan a cabinet chu a siksawi dawn tih a sawi, finance minister Taro aso chu a thlak tur zingah a tel rin a ni. Mahse cabinet siksawi hun tur hi a la sawichiang lo.