Venezuela miten ei tur lei turin Colombia an pan

Venezuela mi sing tel chu Pathianni khan an ram ṭhenawm, Colombia-ah ei tur leh damdawi lei turin an kal.

Pathianni khan Venezuela sorkar chuan Colombia nena an ramri chu darkar 12 chhung atan a hawng a, hemi chhung hian Simon Bolivar international bridge kaltlangin mamawh lei turin mi tam tak an lut. Nikum August thla aṭang khan ramri hi khar a ni tawh.

Venezuela ram hian sum lamah harsatna lian tak a tawk mek a, thil man nasa taka a san bakah an mamawh pawh hnianghnara lei tura a awm lo. Kar hmasa pawh khan hmeichhe 500 vel chu ramri kaltlangin an ṭhenawm ramah hian ei tur lei turin an kal a ni.

President Nicolas Maduro chuan Colombia sipai leh gang ho an ramah an lut ru fo nia sawiin, nikum August thla khan ramri hi a lo khar tir tawh a ni. Ramri khar hian sorkarin man tlawm zawka ei tur a sem chhuahte Colombia rama tawlhruk ṭhin pawh a dang niin a sawi.

Pathianni-a Colombia rama bazar tura kalte hi mi 35,000 vel zet an ni a, Cutua supermarket-ah an mamawhte leiin an ram lamah an kir leh nghal a ni. Colombia rama bazar tura kalten an lei tam ber chu buhfai, oil, chhangphut leh chini-te a ni a, hengte hi an ramah lei tur a van bakah a man a sang chak hle.