Britain PM thar tur Theresa May

Britain Prime Minister David Cameron thlaktu tur candidate pahnih zinga pakhat a inhnuhdawh leh avangin candidate awmchhun, Theresa May-i chu PM thar a ni dawn ta.

British mipuite vote laknaah European Union chhuahsan duh lam an chak hnuin, David Cameron chuan PM a nihna aṭanga a ban tur thu a puang a, amah thlak tur hian rorellai, Conservative Party hruaitu thlan a ngai ta a ni.

Party hruaitu leh PM thlak tur thlan tura chuh tum zing mi panga aṭangin MP-ten vote lain, vote hmu sang pahnih - Theresa May leh Andrea Leadsom-te chu Conservative Party member-ten an thlan tura chhawpchhuah an ni. Mahse rinloh tak takin Leadsom-i a inhnuhdawh leh tak thut avangin Theresa May-i chu Conservative Party hruaitu thar a ni dawn a, PM a ni zui dawn a ni.

Cameron chuan vawiin hian PM hna a lo chelh lailawk chu a bansan nghal ang a, vawiin tlai vek hian May-i hi PM thar atan lakluh a ni dawn tih a sawi.

Conservative party hruaitu chuhtu mi panga zing aṭangin Theresa May-i hi party member tam zawkin an duh ber nia sawi a ni a, kum ruk chhung home secretary leh interior minister hna te a lo chelh tawh avangin sorkar kalphung leh hnathawh dan pawh a hrechiang hle nia sawi a ni bawk.

Kum 59 mi, Theresa May-i hi Britain hmeichhe prime minister pahnihna a ni dawn a, kum 1979-1990 khan Margaret Thatcher-i chuan PM hna hi a lo chelh tawh a ni.

Royal Berkshire-a Maidenhead constituency aṭangin May-i hi kum 1997 khan a ṭum khat nan MP atan thlan tlin a ni a, a hnuah William Hague-a hnuaiah cabinet-ah dah a ni. Politician tawnhriat nei ṭha tak niin, Britain-a Home Secretary dinhmun chelh rei thei ber a ni. Kum 2002 khan Conservative Party chairman niin, hmeichhe zinga party chairman ni thei hmasa ber a ni bawk.

Mi tumruh tak May-i hi hmei≠chhe politician ropui, Angela Merkel leh Margaret Thatcher-te nen tehkhin a ni ṭhin. An rama pemlut chungchangah ngaihdan nghet tak a nei a, UK-a EU citizen ni lo khawsa leh hnathawk tura lut thei chin bithliah siamna policy pawh a lo siam tawh bawk. "Ram rethei zawka cheng mi nuai tel, Britain rama cheng chak tak tak an awm a, mahse pem luh tur chin hi eng ram pawhin bithliah chin an siam a ngai a ni. Kan rama rawn lut thei tur chin thununna tur Immigration System ṭha tak kan neih a ngai a ni" a ti. Kum 2012 khan mahni anpui neih phalna a thlawp thu a lo sawi tawh bawk.

Theresa May :

ν Kum 1956, October 1 ah Eastburne, England-ah a piang.

ν Kum 1980-ah Philip John nen an innei. Philip hi banker ani a, Oxford University an kal lai aṭanga inhria an ni.

ν Oxford University aṭanga a zirchhuah hnuah 1977-1983 chhungin Bank of England-ah a thawk.

ν 1985-1997 chhungin Association for Payment Clearing Services-ah a thawk a, Drunsford Ward-ah councillor a ni bawk.

ν 1997 inthlanpuiah Maidenhead bial aṭangin Conservative MP atan thlan tlina ni.

ν May-i hi Type 1 diabetes nei a ni a, ni khatah insulin injection vawi li a lak ziah a ngai.