US-in Iraq-ah sipai 560 tirh belh dawn

US chuan Iraq sipaiten Islamic State (IS) firfiak pawl kut aṭanga Mosul khawpui laklet tuma an beihna pui turin sipai 560 tirh belh a tum.

US Defence Secretary Ashton Carter chuan Thawhṭanni khan Iraq a tlawh a, sipai tirh belh an tum thu hi a sawi a ni. Heng sipai zinga a tamzawk hi Mosul chhim lam km 64-a hlaa Qayara airbase-ah dah an ni ang. An zingah hian engineer leh logistics personnel te pawh an tel. Anni hian Iraq khawpui lian pahnihna, Mosul laklet tuma Iraq sipaiten ruahmanna an siamah an pui dawn a ni.

Sipai tirh belh tur nen hian Iraq-a sipai awmzat hi 4,647 an tling tawh dawn a ni.

Iraq sipaite chuan kar kalta Inrinni khan IS kut aṭangin Qayara airbase hi an la let a, Iraq Prime Minister Haider al-Abadi chuan airbase an la let chu Mosul khua lakletna kawngah thil pawimawh tak a ni tih a sawi.

IS hian tunhnaiah Iraq leh Syria-a an ram lak eng emaw zat an hloh tawh a, February thla khan US thlawpin Syria sipaite chuan al-Shadadi khua an la let a, nikum December thla khan Iraq sipaiten Ramadi khua an lakkir bakah, thla hmasa khan Fallujah khua an la let tawh bawk.

PM Abadi chuan kumin kumtawp hma ngeiin Mosul khua hi laklet an tum tih a sawi.