IS-in Tunisia museum beitute an nih thu sawi

Islamic State(IS) firfiak pawl chuan Nilainia Tunisia khawpui, Tunis-a National Bardo Museum beitute chu an mi leh sate an ni, an ti. Museum beihna ramdang mi khualzin thi te hi 20 an tling tawh a ni.

Tunisia museum beihnaah thi, ramdang khualzinte hi Japan, Italy, Spain leh Britain aṭanga kalte an ni a, Tunisia mi pathum an tel bawk. Museum hi Parliament compound, uluk taka venhim chhunga awm a ni. Pawikhawihtute hian sipai uniform hain, museum chhung hi an lut a ni.

Official-te chuan firfiak pawlin an tih nia an sawi hi an nemnghet lo a, mahse museum beitu zinga pa­hnih, sipaite'n an kahhlumte hi tute nge an nih tih an finfiah tawh a, Tunisia mi ve ve an ni tih an sawi.

Sipaite kahhlum pa­hnihte hi Libya-a IS camp-ah an training tawh niin Tunisia sorkar chuan a sawi. Interior ministry official Rafik Chelli chuan mi pahnihte hi Tunisia ram aṭanga IS pawla lakluh an ni a, nikum September thla khan Libya ramah an kal a ni, a ti.

Tunisia thuneitute chuan pawikhawihna kaih­hnawihah hian mi pali an man tawh tih an sawi. An man zingah hian sipaite kahhlum chhungte pawh an tel.

President chuan an rama pawikhawihna a thlen hnuah venhimna tikhauhin, security duty pawh tihpun a ni tih a sawi. Khawpui lian zualahte chuan venghimtu dah belh an ni.

US chuan IS-te'n an bei nia an sawi hi an la finfiah thei lo tih a sawi a, mahse pawikhawihtute chetdan chu IS te chetdan zul a ni tih a sawi. Tunisia sorkar chu firfiakte beih letna kawngah ṭanpui a inhuam thu a hrilh bawk.