Boko Haram-te hneh an ni thuai ang: Goodluck Jonathan

Nigeria President Goodluck Jonathan chuan an ram hmarchhak biala hel, Boko Haram-te chu thla khat chhunga hneh a, an ram lak tawhte pawh lakkir leh theih a beisei thu a sawi.

Goodluck Jonathan chuan Boko Haram-te hi nitinin an chak lo telh telh zel a ni tiin, hemi rual hian hel an beihna kawngah sipaite pawh an che chak tawk lo tih a phat loh thu a tarlang.

Kum 2012 aṭanga Boko Haram leh sipaite inbeihna avanga thi hi mi 15,500 vel an tling tawh a, mi tam tak hmun him lamah an tlanchhe tawh bawk.

Tun hnaiah Nigeria sipaite hian ngawrh takin helho lakah beihpui an thlak a, tunkar tir lam khan hmarchhak biala state pahnih, Yobe leh Adamawa-te chu helho kut aṭangin an lakir tawh niin an sawi. Hei bakah hian Boko Haram pawl lo din ṭanna, Borno state pawh an lakir leh ṭep tawh tih an sawi.