Myanmar military court-in dam chhung tang turin journalist hrem

Myanmar military court chuan counter-terrorism law hnuaiah local journalist pakhat chu dam chhung tang turin a hrem a, a thawhpui pakhat chu kum 20 tang turin a hrem bawk.

Journalist hremte hi independent online news service, Dawei Watch-a thawk Myo Myint Oo leh Aung San Oo te an ni. Kum 2021, February thlaa sipai chakna hmanga Aung San Suu Kyi kaihhruai civil sorkar thuneihna hnehchhuh a nih hnua journalist hremna pek nat berte an ni.

Myanmar hi China dawta journalist man tawk an tam zualna ram niin, Paris-based freedom group Reporters Without Borders chuan a tarlang. Kar liam taa sipaiten chhim lama Mon state an beih ṭumin freelance journalist pahnih chu thah niin, pakhat man a ni bawk.

Myo Myint Oo (41) leh Aung San Oo (49) te hi nikum December thla khan an khua, Myeik-a an chenna inah a hran ve vea man an ni. Sipai sorkar chuan case an siamsak chungchang hi an sawichiang duh lo. Dawei Watch media chief editor, Kyaw San Min chuan hremna pek an nih thu hi a sawi a, mahse ani pawhin an chungchang hi sawi thui tur a hre bik lo a ni.

Sipai sorkar an hlauh avangin media outlet tam zawk chuan online chauhin an ti chhuak tawh a, ṭhenkhat chuan biru chungin an enkawl a ni. Media outlet 15 chu an license tihtawp sak niin, journalist 172 vel man an ni tawh bawk. An zinga ṭhenkhat chu chhuah ni tawh mah se tun thleng hian mi 40-50 vel chu hren an la ni a, a zahve vel chu thiam loh chantir an ni tawh bawk. Journalist man tam zawkte hi Counter-terrorism law bawhchhia leh, sipai sorkar chungchanga thu dik tawk lo thehdarh a, mipuite rilruah hlauhna tuhah te puh an ni.