Bangladesh MP hlui Hasina lakah thubuai 100 chuang siam tawh

Bangladesh prime minister hlui, Sheikh Hasina leh a thawhpuite laka thubuai ziah luh chu 100 a chuang tawh a, heng zingah hian thubuai rip tak tak - tualthah leh mihring puite laka pawikhawihna thlena puhnate a tel.

Sorkarin quota policy a siam duh lohna lantira zirlai leh mipuite ram puma nawrh an huaihawt hnuah, August 5,2024-a Hasina party, Bangladesh Awami League kaihhruai sorkar chu a tluchhia a,amah pawh himna zawngin India ramah a tlanchhe zui bawk. Hemi hnu hian a hmasa ber atan Hasina lakah hian August 13-ah thubuai ziah luh a ni a, a thubuai 100-na chu August 29-ah International Crimes Tribunal-ah ziah luh a ni leh a ni.

Hasina bakah a minister hlui leh Parliamentery member hluite lakah hian International Crimes Tribunal-ah thubuai pariat leh, ram chhunga police station hrang hrangah 92 ziah luh a ni tawh.

Kumin July thla laihawl aṭanga Bangladesh-a tualchhung buaina thleng vanga thi 600 an chuang tawh a ni. Minister leh Awami League party hruaitu eng emaw zat man an ni tawh bawk.