Germany-ah inkhuahkhirhna dan duh lo mi 100 chuang man

Germany sorkarin Covid-19 vanga inkhuahkhirhna dan a siam zawm duh loa nawrh huaihawt zinga mi 300-te chu police-ten an man. 

Kar liam ta Inrinni khan mi 38,000 vel chu Germany khawpui Berlin-a kawtthler hrang hrangah nawrh huai­hawtin sorkarin hri leng vanga inkhuahkhirhna a siam duhlohna an lantir a ni. Berlin-a Brandenburg Gate-ah chuan kawng zawhte hian buaina siamin, lung leh bottle hmangin police-te an tawng. 

Berlin-a Russian Embassy kawtah pawh pungkhawmin, pungkawmte dang tura police lo dingte chu mipuite chuan tawn tlangin, embassy kawtah hian an awm lui a, mahse a hnuah police-te chuan pepper spray hmangin an hnawt darh. Victory Column hmunah pawh nawrh huaihawt a ni a, he hmuna nawrh huaihawttute hi Querdenken 711 pawl an ni. 

Hei bakah hian Europe rama khawpui hmun ṭhenkhatah pawh nawrh huaihawt a ni a, Covid-19 hri leng chu intih­derna mai mai a nih thute an tarlang. London-a Trafalgar Square-ah mi 1,000 chuang an pungkhawm a, sorkarin inkhuahkhirhna a siamte chu an dodal a, hmaituamna chu hmui phuarna niin pungkhawmte chuan an sawi. Paris, Vienna leh Zurich-ahte pawh nawrh hi huaihawt a ni bawk. 

Germany hi kumin kum tir lam khan Europe ramte zinga Covid-19 hri darhna hmun hmasa a ni a, sorkarin theihtawp chhuaha inkhuahkhirhna a hman hnuah April thla khan inkhuahkhirhna chu thlahdul chhoh a ni. 

Mahse hri kai thar hi August aṭang khan an awm leh nual tak avangin sorkar chuan inkhuahkhirhna a hman chhun­zawm leh a, mahse mi ṭhenkhat chuan inkhuahkhirhna hi mimal dikna leh zalenna inrahbeh saknaah ngaiin an dodal a ni. 

Kar liam ta Ningani khan Germany Chancellor Angela Merkel chuanstate 16-ah hmaituam lote chu €50 (£45; $59) chawitir an nih tur thu a sawi. Mipui punkawm chu nakkum atan thleng khap a la ni bawk.