Harris-in Arlington thlanmual a tlawh chungchangah Trump a sawisel

United States president inthlan neih tura Republican candidate, Donald Trump chuan sipai thlanmual, Arlington National Cemetery a tlawhna video chu a campaign-na video a siamnaah a telh avangin Democrats candidate Kamala Harris chuan a sawisel a, politics-a hlawkna tel tum zawnga hmang lo turin a chah.

Kamala Harris chuan,"Hmun zahawm tak a ni a, America pasalṭhate chawimawi tura kan intawhkhawm ṭhinna hmun niin politics khelhna atana hman tur a ni lo," tiin campaign video-a an dah tel avangin na takin Trump chu a sawisel.

Republican presidential candidate, Donald Trump hian an sawiselna chu chhang letin, Afghanistan-a sipai thi ta chhungte chuan Arlington tlawh tur hian an ngen a, an tlawh lai thlalak chu an beisei tel tih sawiin hei hi a lo remtih thu Trump chuan a sawi. JD Vance chuan president hlui Trump hi lo chhanin Harris chu Afghanistan-a US tana nunna hlantute ngaihthahah a puh let ve bawk.

US President inthlan neih tur atana inpuahchahna a kal mek a, candidate pahnihte hian an khingpui bei turin remchang an zawng reng tawh a ni. Kumin inthlana chak zawk tura mipui rin dan lakkhawmah Harris hi a la chungnung hret rih a, kar liam ta Ningania Reuters-in poll an tihchhuahah Harris chak tura ringtu hi 45% an nih laiin Trump erawh 41% in a chak an ring thung.