UNICEF-in mpox vaccine siam chhuah a nih theih nan hma an la

United Nations Children's Emergency Fund (UNICEF) leh Africa CDC, Gavi leh World Health Organization (WHO) ṭangrual chuan monkey pox hri lenna ram tan a rang thei ang bera vaccine siam chhuah a nih theih nan hma an la.

UNICEF hian vaccine siam chhuaktuten chak zawka hma an lak theih nan emergency tender an tichhuak a, hemi hmang hian vaccine lei leh sem chhuah hna chu chak zawka an kalpui theih an inbeisei a ni.

UNICEF hian tender tichhuak tawh mah se sum pek leh pawmpuina dang erawh an neih hmasak a ngai thung. Mpox vaccine hi an siam chhuah tam theih dan a zirin kum 2025-ah dose mtd 12 neih theih an beisei.

Africa CDC director general Dr. Jean Kaseya chuan Africa khawmualpuiah mpox vaccine hi a rang thei ang bera sem chhuah a ngai tih a sawi. Democratic Republic of Congo-ah kumin chhungin mpox hri vang hian mi 629 an thi tawh a, a kai 18,000 chuang an awm tawh bawk a ni. DRC ram ṭhenawmah he hri hi a ṭai darh mek a ni.

UNICEF hian vaccine siam chhuah a nih theih nana ṭan an lak bakah mpox hri a darh zel loh nan bungraw mamawh - invenna hmanrua, hri endikna leh hri enkawlna atana pawimawhte chu mpox darhna ramah a thawn lut tawh bawk.