Naktuk aṭangin Wuhan-ah school hawng dawn

Covid-19 hri darh ṭanna,  China-a Wuhan khuaa tualchhung thuneitute chuan school leh pre-school (kindergarten) te chu naktuk aṭanga hawn a nih tawh tur thu an tarlang.

Ruahman lawk dan chuan vawiin aṭangin Wuhan University chu hawn tum a ni a, naktuk aṭangin school hawn tum a ni bawk tih Wuhan thuneitute chuan an sawi. Wuhan-ah hian Covid-19 hri leng vangin hun engmaw chen zirna chhunzawm theih a ni lo a, mahse tunkar chho aṭang hian autumn (favang) semester ṭan an tum tawh a ni. 

Wuhan-ah hian educational institution 2,842 vel a awm a, heng hmunah te hian naupang zirlai maktaduai 1.4 vel an awm mek. Zirna in hawn a nih dawn tak avangin zirlai naupangte chu hmaituamna vuah ngei ngei turin an hriattir a, school zawng zawngah disease control equipment dah vek turin school thuneitute hriattir an ni bawk. Zirna an ṭan hunah nitinin health lama thuneitute hnenah naupang te hriselna dinhmun thehlut ziah tur a ni a, ṭul loah school-a punkhawmna siam khap a ni. 

Ramdang mi zirlai leh zirtirtu te chu an luhna leh thawhna school aṭanga an zirlai ṭan/zir zawm leh emaw zirtir thei tura sawmna an hmuh loh chuan school kal khapsak an la ni thung. Wuhan-ah hian April thla aṭang khan Covid-19 hri leng hian ziaawm lam a pan chho a, lockdown pawh an hlih tawh bakah May 18 aṭang khan tualchhunga hri kai thar hriat an awm tawh lo.