Yemen khawpuia bomb puakah mi 142 an thi

Yemen khawpui, Sanaa-ah thihchilh bomb tihpuah a ni a, bomb puak vanga thi mi 142 an tling tawh. Mi dang tam takin hliam an tuar bawk.

Islamic State (IS) firfiakte chuan kar kalta Zirtawpni tlaia Sanaa-a mosque pahniha ṭum tam tak bomb puak chu an tih niin an chhal. Pawikhawihna rapthlak tak a thlen hma ni hian President Abedrabbo Mansour Hadi thlawptu sipaite leh Houthi Shiite helte chu chhim lama Aden khawpuiah an inkap bawk.

Thihchilh bomb tihpuahna mosque pahnih Sanaa khawpui chhim lama awm, Badr mosque leh al-Hashoosh mosque an ni a, Houthi lamṭangte lawina ṭhin an ni. Houthi helte hian Sanaa khawpui hi an la tawh a ni. Firfiakte hi mosque chhunga ṭawngkai inkhawm neih laiin an lut a, an bomb pai hi an tipuak a ni.

Yemen rama pawi­khawihna thleng vang hian nimin khan UN Secu­rity Council chuan emer­gency meeting a nei a, thuchhuah pawh an siam nghal rin a ni.

UN Secretary General Ban Ki-moon chuan Yemen rama pawikhawihna thleng chu a dem thu a sawi.

US chuan pawi­khawih­na a thlen hnu hian venthawn thilah Yemen rama a statff-te chu a la­chhuak vek dawn tih a sawi. State Department thupuangtu, Jeff Rath­ke chuan Inrinni khan thu­chhuah siamin, 'Yemen ram security din­hmun tlahniam zel avangin, US sorkar chuan a mi leh sa awmte chu lakchhuah lailawk a tum a ni' a ti.