IS-in thah tura a duh US sipai hming 100 a tarchhuak
Islamic State (IS) firfiak pawl chuan internet-ah US sipai ṭanglai zinga mi 100 hming, an address leh an thlalakte chu a tarchhuak a, America rama IS mi leh sa awmte hnenah an hming tarchhuahte chu that turin an chah nghal bawk.
Pentagon chuan internet-a thil post hi an chhui chiang mek tih a sawi a, he thil hi IS-te tih a nih tak tak em tih an la hriatchian loh thu a sawi.
US sipaite hming tarchhuaktu hi Islamic State Hacking Division a inti a, sapṭawnga ziakin tunhnaia US sipai server, database leh email eng emaw zat an hack sak tawh tih a sawi a, mi 100-te chanchin chipchiar an tarlan chhan chu an mi leh saten an thah theihna tura ti an nih thu a sawi bawk.
New York Times chuan IS-ten information an tarchhuah chu US sorkar server aṭanga hack nia a lan loh thu a sawi a, Defence Department official pawhin an chanchin tarlante chu awlsam takin social media aṭanga hmuh theih vek an ni, a ti.