Israel President-in PM thar tur a sawipui

Israel President Reuven Rivlin chuan nimin aṭang khan party hrang hrang aiawhte a berawnin, Prime Minister thar atana an rawtte a zawt.

Kar hmasa khan Israel ram inthlanpui hi neih a ni a, Prime Minister ṭanglai Benjamin Netanyahu-a party, Likud party chu seat la hnem ber ni mah se, party mala sorkar a siam phak loh avangin ṭangrual sorkar a din leh a ngai dawn a ni.

Rightwing Likud Party hian Parliament, Knesset-a seat 120 aṭangin seat 30 a la a, amah hnaih bertu centre-left Zionist Union chuan seat 24 a la.

Inthlana seat la hnem ber chu sorkar siam ngei ngei tur a ni kher lo a, party lian ber hruaitu chu PM atana dah kher tur a ni chuang lo. Sorkar siam thei tura seat mamawh zat, seat 61 an nei thei tura party thawkhoten sorkar hi an siam dawn a ni.

Kar kalta Ningani khan inthlan result hi tihchhuah ni mah se, official erawh chuan March 25-ah tihchhuah a ni chauh ang. Hemi hunah hian Central Elections Committee chuan result kimchang hi President Rivlin-a hnenah hlanin, a ni hian sorkar thar siam tura a thlan chu a puang ve leh ang.

President hian inthlan result a dawn aṭanga ni sarih chhungin sorkar thar siamtu tur hi a tihfel a ngai a ni. Hei vang hian rang taka tihfel a nih theihna atan official-a puan a nih hma aṭangin party hrang hrangte lo biakrawn hmasak hi a duh a ni.