Tribunal-in China thiam loh chantir

China-in South China Sea neitu nia a inchhal chungchang, Philippines ramin International Tribunal-a a thlen chu ngaihtuah a ni a, Tribunal chuan China hian neitu nihna inchhal theihna tura finfiahna engmah a nei lo, a ti.

Permanent Court of Arbitration thutlukna siam hi China chuan a pawm lo thung a, thutlukna dik lo tak a ni, a ti.

Chian hian South China Sea huam chin pum deuh thaw chu a ram chinah a chhal a, heng zingah hian a ṭhenawm ramten an ram china an chhal, thliarkar leh reef te pawh China huam chhung a mi vek niin a chhal a ni.

The Hague-a tribunal chuan China hian Philippines Sovereignty Rights a palzut sak niin a sawi a, South China Sea-a Aritifical Islands a siam avangin Environment pawh nasa takin a tichhia a ni, a ti bawk.

Permanent Court of Arbitration hian Philippines thubuai thehluh chungchangah hian thutlukna siam mah se, a thutlukna siam kengkawh tur hian thuneihna erawh a nei lo thung. China-in a ram chin nia a chhal a chhinchhiahna, 'nine-dash line' chu UNCLOS convetion hnuaiah dan kalh a ni tiin court chuan a sawi.

China President Xi Jinping chuan court-in South China Sea chungchanga thutlukna a siam chuan, China-in a ram chin leh tuipuia thuneihna a neih chin a chhalah nghawng engmah a nei dawn lo tih a sawi. China chuan boruak muanawm siam a duh a, South China Sea chungchanga an
ṭhenawm ramte nena an buaina chu inbiakna hmang leh, International Law hmanga chinfel a duh a ni, a ti. Court thutlukna siam chu pawm tlak loh niin a sawi bawk.

South China Sea chuhtu zinga pakhat, Taiwan pawhin court thutlukna chuan tuipuia an ramin chanvo a neihte a tichhia a ni tiin, an pawm theih loh thu a sawi. Hetihlai hian US chuan China hian a ram ṭhenawmte nena neitu nihna an inchuh mekna, South China Sea-ah hian sipaite patrol-a a tirh leh nunchan an zir ṭhin avangin an inkar boruak a tichhe zual niin a ngai thung. Court thutlukna siamchu thutawpa ngai tur leh, zawm turin a ngen.