Israel group-in Facebook an khing

Israel rights group chuan Palestinian mite kut tuara thi chhungte hnenah US dollar tluklehdingawn khat pe turin Facebook a khing.

Shurat Hadin group chuan Facebook hian Palestinian firfiak pawl, Hamas leh pawl dangte chu tharum thawhna thlen tur zawnga thu thehdarh a phalsak avangin US Anti-Terrorism Act a palzut a ni, a ti.

Hetihlai hian Hamas chuan he thil hi Israel-in Facebook blackmail a tumna niin a puh thung.

Facebook khinna thubuai thehluha mitthi hming an tarlante hi American vek an ni a, an zingah hian kumin March thlaa Israel tlawha zin, Palestinian miten an vihhlum tak Taylor Force bakah midangte chu kum 2014 leh 2016 inkara West Bank leh Tel Aviv-a Palestinian mite kut tuara thi, Israel-US dual citizen-te an tel.

Thubuai hi US District Court for the Southern District of New York-ah thehluh a ni a, Facebook hian hre reng chungin Hamas firfiak pawl tan inbiakpawhna tur te, member lak thar na tur te, pawikhawihna thlenna tur ruahmanna siamna te, pawikhawihna thlenna tur remchangte a siamsak a ni, a ti. Social media hmanga an infuihna avang hian nikum October thla aṭang khan pawikhawihna a hluar a, Palestinian mite kutah Israle mi 35 leh ramdang mi pali an thi tawh niin Israel chuan a sawi bawk.