Tharum thawhna thlen tirah Zimbabwe pastor puh

Zimbabwe sorkar economic policy duh lohna lantira campaign neihnaa an hruaitu zinga mi, pastor Evan Mawarire chu tharum thawhna thlen tura mipuite fuihpawrhah puhin thubuai siamsak a ni.

Zimbabwe ram hian sum lamah harsatna nasa tak a tawk mek a, sorkar hnathawkte hlawh pawh a pe mumal thei lo a ni. Hei vang hian sorkarin sum enkawl danah lungawi lohna lantir a ni a, activist-te chuan kar kalta Nilaini khan 'stay-at-home' protest an lo huaihawt tawh a ni.

Stay at home protest hi nimin khan nei lehin, vawiinah pawh chhunzawm tum a ni. Nawrh ṭan hma hian police-te chuan Pastor Mawarire hi thu zawhfiah turin an ko a, hemi hnu hian section 36 hnuaiah muanna tichhe zawng leh tharum thawh tura mipuite fuihah puhin thubuai hi siamsak a ni.

Newsday chanchinbu chuan an ram khawpui, Harare-a police station-a koh a nih hian pastor hian Bible leh Zimbabwe flag kengin a kal a, police-ten enfiah an duh ber, a mobile phone erawh a keng tel lo niin a tarlang.