SKorea leh New Zealand in Free Trade Agreement ziak

South Korea leh New Zealand chuan sumdawnna lama thawhdunna tur thu­thlung, free trade agree­ment (FTA) chu nimin khan an ziak.

Inremna thuthlung hi Seoul-a presidential office Cheong Wa Dae-ah South Korea Trade Minister Yoon Sang-jick leh New Zealand Trade Minister Tim Groser-ten an ziak. SKorea President Park Geun-hye leh New Zealand Prime Minister John Key-te pawhin an telpui a ni.

John Key hi ni thum cham turin Pathianni khan Seoul a thleng a, a PM chhunga vawi li a tlawhna a ni.

SKorea President Park-i chuan ram pahnih­te chuan kum 53 chhung palai intir tawn­in inzawmna ṭha tak an nei a, tunah FTA an ziak leh thei chu thil chhinchhiah thlak tak a ni, a ti. Ram pahnih hruaitute hian fishery leh defence industry bakah science, information leh communication sector-ah thawhdunna ṭha zawk neih an remti.

Inremna an siam hnuaiah hian New Zealand chuan kum sarih chungin South Korean product-a tariff a siamte a tihtawp vek ang a, South Korea hian New Zealand aṭanga a thil lakluh zinga 96.4% a tariff a siamte chu kum 15 chhungin a titawp bawk ang. Ram pahnihte insumdawn tawnna hi kum 2014 khan US dollar tluklehdingawn 3.26 hu a ni a, South Korea-in New Zealand-a a thawnluh hi tld 1.73 hu a ni.