Israel mipuiten Gaza-a inkahhai puang turin sorkar an ngen

Israel sipaiin Hamas mi hren paruk ruang an chhar hnuah, mi tang chhuah tur leh Gaza indona a tawp theih nana Hamas nen inremna an neih theih loh avangin Israel prime minister Benjamin Netanyahu chuan dem a hlawh hle.

Hamas mi hren paruk thah an nih hnu, Pathianni tlai aṭang khan Israel khawpui Tel Aviv, Jerusalem leh khawpui dangah mipui pungkhawmin, Hamas mi hren la damte him taka hruai haw an nih theih nan sorkar chu chak zawka hma la turin an nawr.

Jerusalem-a nawrh huaihawtte chuan kawngpui dangin Prime Minister chenna in kawt thlengin lungawi lohna hi an lantir a ni. Nawrh huaihawt a nih avang hian Thawhṭanni thleng khan ram chhung hmun ṭhenkhatah nunphung a khaihlak nasa hle a ni.

Israel mipui leh mi tang thah tak chhungte chuan Netanyahu an dem hle a, Gaza indona titawp turin inremna pawm ni se mi tangte hi him takin an kir dawn tih an sawi. Hetih rual hian Israel mipui zingah Hamas nuai chimih duha Netanyahu hmalakna thlawp an awm ve reng bawk a, ramchhung hmun ṭhenkhatah nawrh hi huaihawt a ni lo.

Israel media-te chuan nawrh huaihawt kaihhnawihah hian mi 29 man an ni tawh tih an tarlang. Police-ten kawngpui dangtu nawrh huaihawtte hnawhdarh an tumna lamah water canon an hmang tih an tarlang bawk.

Hamas chuan an mi hren paruk an thah chhanah hian Israel leh United States chuan mawh an phur tih an tarlang. Israel leh US chuan inkahhai puang tura inremna an zawnna kawngah thil phut thar an nei zel tih an sawi a, an mi hrente chhuah zalen an nih theih nan Gaza indona tihtawp, Israel sipai zawng zawng hnuhkir leh Palestinian mitangte chhuah zalen an phut a ni.