Iraq-in chhiarpui neih turah ni 2 curfew puang dawn

Iraq sorkar chuan November thla hian chhiarpui neih a tum a, hemi atan hian ni hnih chhung curfew puan a ni ang. Census hi kum 27 hnua an neih lehna tur a ni.

Prime minister Mohammed Shia al-Sudani chuan hemi chungchangah hian thuchhuah siamin, "November 20 leh 21 hian population census neih a nih dawn vangin, Iraq province zawng zawngah curfew puan a ni ang," a ti.

Census neihna tur hian hmalakna hrang hrang pawh pawm ni tawhin, heng zingah statistical staff-te training pekna turte pawh a tel. Ministry eng emaw zat chuan training neihna atan hian classroom leh youth centre-te hman an phalsak tih report chuan a tarlang bawk.

Iraq hian general census a neih hnuhnung ber chu kum 1997-ah niin, province 15-ah neih a ni a, Kurdistan biala province pathumah erawh neih a ni lo. Chhiarpui hi neih tum leh ṭhin mahse tualchhung buaina vangin a sawn leh zel a ni. Tun ṭum chhiarpui neih turah hian Kurdistan bial pawh telh vek a ni dawn a, hemi atan hian Kurdistan Regional Government (KRG) thawhpuina tur pawh an tifel tawh a ni. Tuna Iraq-a mihring awm zat hi mtd 43 vel nia chhut a ni.