Myanmar-in 2025 inthlan neih tur atan chhiarpui nei dawn

Myanmar sipai thuhnuaia awm, state media chuan kumin October hian sipai sorkar chuan rampum huap chhiarpui a nei dawn tih nimin khan a puang.

Myanmar rama mi cheng zat leh chenna in awm zat hi October 1 - 15 inkarah lakkhawm a ni anga, hei hi nakkum lama inthlanpui neih a nih hunah hman ṭangkai a ni dawn tih sipai hotu Min Aung Hliang chuan Pathianni khan a sawi tih state media chuan a tarlang.

Min Aung Hlaing chuan, "Chhiarpui hi vote thlak thei dik tak hriat nan a ṭangkai dawn a, voter list dik neih hi inthlanna dik leh felfai neih a nih theih nan a pawimawh a ni," a ti.

Myanmar inthlanpui neih tur hi dik leh felfai takin kalpui a ni dawn em tih zawhna erawh a lian hle a, sipai sorkar hian political party hrang hrang inthlan chuh thei lo turin a hnawl tawh a, heng zingah hian Aung San Suu Kyi awmna party National League for Democracy (NLD) pawh a tel a ni.

Sipai sorkar hi a ram mipuiten an dodal nasa hle a, hnam hrang hrang helpawlin an do avangin ramchhung hmun tam tak sipaite thunuaiah an awm tawh lo. Special Advisory Council for Myanmar in kumin May thlaa a tarlan danin, sipai sorkar hian ram chhunga khaw 86% ah thuneihna an hloh tawh a, heng khuaa chengte hi Myanmar mipui 67% an tlin phak avangin sipai sorkar hian Myanmar hi a thuhnuaiah a dah tawh lo a tih theih niin an tarlang a ni.