US-in ram luahsak titawp turin Israel phut
United States chuan Israel sorkar thar ding tur chuan kum 50 dawn Palestinian ram a luahsak chu a tihtawp a phut bakah, Palestinian state a din theihna tura kawng a sial a beisei thu a sawi.
White House chief of staff Denis McDonough chuan Thawhṭanni-a Jewish American-te hmaah he thu hi a sawi a, Israel te himna turin theihtawp an chhuah zel dawn tih a sawi. Hemi rual hian Israel Prime Minister Benjamin Netanyahu chu inthlanpui neih dawna Palestinian state a din tir lo ang ti a sawi chungchangah na takin a sawisel bawk.
Netanyahu hian Israel ṭangrual sorkar thar siampui tur zawngin hma a la mek. Israel President Reuven Rivlin chuan Netanyahu hian Parliament member 120-ah thlawptu member 67 a nei niin a sawi. Party mala seat la hnem ber, Netanyahu-a party Likud Party hi Jewist Home party, Yisrael Beitenu party leh centrist Kulanu bakah, ultra-Orthodox party-te'n an thlawp a ni.
Netanyahu hian sorkar thar siam turin ni 28 hun a nei a, hemi chhunga a tifel hman lo a nih chuan President hnenah hian ni 14 hun pekbelh turin a dil thei ang. Mahse Netanyahu hian Israel Independence Day, April 23-a lawm a nih hmain sorkar thar a siam thu hi puan a tum.
US President Barack Obama adviser, Denis McDonough chuan Israel long-term security tana ṭha ber tur chu Palestinian state hran din chu a ni, a ti. "Kum 50 dawn ram inluahsak hi tihtawp a hun tawh a ni. Palestinian mipuite chuan anmahni ramah inrelbawlna hrang cheng leh or inrelsak turin dikna an nei a ni," a ti.
Palestinian hian Gaza Strip, West Bank leh East Jerusalem-ah state din a tum a, an state khawpui atan East Jerusalem chu hman a tum a ni. Heng ramte hi kum 1967 Arab-Israel war aṭang khan Israel-in a la luahsak a ni.