Sri Lanka Tamil-te'n indo laia pawikhawihna chhui chian phut

Sri Lanka-a Tamil mite chuan Thawhṭanni khan an ram hmar leh khawchhak lam province-ah kawngzawhin, an ram civil war laia mihring dikna chanvo palzut a nih dan chu rampawn lam mi chhui chian an phut.

President Maithripala Sirisena kaihhruai sorkar chuan human rights palzut a nih dan hi an ram miin chhui turin a rawt a, mahse he rawt­na hi ram mipui, a bikin Tamil mite chuan an pawm lo. Thawhṭannia kawngzawhte hian pawikhawihna thleng chu ramchhung mite'n an chhui an duh loh thu Tamil ṭawng leh English-a ziakin an keng lang bawk.

Sri Lanka sorkar leh Tamil hel, LTTE-te kum sawmthum zel an inbeih hnuah kum 2009 khan tual­chhung indona hi a tawp a, helpawl nena an indo chhung hian sipaite chuan mihring dikna an palzut nasa hle nia sawi a ni.

Nikum March thla khan member UNHRC member 47 chuan resolution siamin, Office of the High Commission chu Sri Lanka-a helpawl leh sipaite'n human rights an palzut dan chhui turin a ngen.