Britain-in PM thar a nei ta

David Cameron-an Britain Prime Minister a nihna aṭanga a ban thu a puan hnuah a mah thlaktu tura thlan, Therea May-i chu Nilaini khan Prime Minister thar a ni ta. Queen Elizabeth-i rorelna hnuaia Britain PM 13-na leh hmeichhe zingah he dinhmun chelh thei pahnihna a ni.

Nilaini khan David Cameron chu Buckingham Palace-ah kalin, Queen Elizabeth hnenah banna lehkha a thehlut a, Cameron hi a nupui leh a fate an ṭawiawm a ni. Queen nena inbiakna an neih hnuah hian lalnu hian Cameron leh a chhungte hi a thlah a ni.

Cameron chhungkua-in lal in an chhuahsan hnu lawkah, amah thlaktu tura thlan Theresa May leh a pasal Philip-te chu lal-in hian thleng ve lehin, Queen Elizabeth an hmu ve leh a, May-i hnenah hian PM dinhmun hlan a ni ta a ni. Buckingham Palace aṭang hian PM chenna, 10 Downing Street an pan nghal a ni.

PM a nih hnua a thusawi hmasak berah, May-i chuan dik lo taka rorelna tibo tura theihtawp a chhuah tur thu a sawi. An ram mipuiten harsatna an tawh hrang hrangte, mingo ṭhalai hnathawk chunga university kalten harsatna an tawh dan te, British mihang ten justice system hnuaia harsatna an tawh dan te, hnathawhna hmuna hmeichhia te harsatna te, rilru lam natna nei leh ṭhalai, mahni puala in neih ve ngei beiseitute harsatna tawh hrang hrangte a sawichhuak.

Kum 59 mi, May-i hian a cabinet a siksawi nghal a, foreign secretary tana London Mayor hlui Boris Johnson a ruat chuan mak tih a hlawh hle. Johnson hian cabinet post a la chelh ngai lo a, heti chunga post pawimawh tak pek a ni nghal chu a hmabak a hautak dawn hle a ni. Chancellor George Osrborne thlakin, Philip Hammond a dah bawk. Defence Secretary Michael Fallon chu a hna ngai chelh chhunzawm tir a ni a, Home Secretary atan Amber Rudd, Secretary of State for Exiting EU atan David Davis leh International Trade Secretary atan Liam Fox-te a dah.

German Chancellor Angela Merkel chuan May-i hi biain, lawmpuina a hlan a, ram pahnihte chuan inṭhian- ṭha tak an nih chhunzawm zel tur thu a sawi. France President Francois Hollande pawhin PM thar hi biain, EU aṭanga Britain chhuah tum chung≠changah inbiakna a rang thei anga neih a ṭul thu a hrilh. European Commission President Jean-Claude Juncker pawhin May-i hi EU nena inbiakna nei thuai turin a ngen nghal a ni.