Pakistan school beihna ruahmantu ber a thi

Pakistan Taliban hotu, kum 2014-a Peshawar khawpuia school beihna thleng ruahmantu ber nia puh, Umar Narai chuan US-in Afghanistan-a drone hmanga beihpui a thlaknaah a thi.

Umar Khalifa leh Khalid Khurasani tia hriat bawk, Umar Narai hi kar kalta kartawp lam khan Nangahar province-ah a thi niin Pakistan leh America security official-te chuan an tarlang.

Kum 2014, December thlaa Taliban firfiakten Peshawar khawpui-a school an beihnaah hian mi 150 an thi a, an zinga a tam ber chu school naupang an ni.

US sipaiten firfiakte laka beihpui an an thlaknaahhian Narai bakah an pawl mi leh sa midang pali an thi bawk niin Pentagon press secretary Peter Cook chuan a sawi. US General John Nicholson pawhin Pakistan sipai hout, General Raheel Sharif biain, Narai thih thu hi a hrilh tawh niin sipai thupuangtu, Lieutenant General Asim Bajwa chuan a sawi bawk.

Pakistan official-te chuan Narai hi Pathianni-ah a thi niin an sawi a,mahse US chuan Inrinni-ah a thi niin a sawi thung.

Narai hi kum 2015 September thlaa Taliban-ten Peshawar air force base an beihna ah te, kumin January thlaa Charsadda khuaa Bacha Khan University beihnaah te a inhnamhnawih nia sawi a ni bawk.

Pakistan Taliban, Tehreek-e-Taliban tia sawi bawk chuan Narai-ah thihna chungchangah hian thuchhuah engmah a la siam lo. Tehreek-e-Taliban hian Pakistan sorkar laka indo a puang a, Afghan Taliban nen pawh an inzawm lo a ni.