State pawimawh pahnihah Trump-an Clinton-i lehpel

November thlaa US President thlan tura inbitum tur, Republican nominee tur Donald Trump leh Democratic nominee tur Hillary Clinton-te chuan campaign an chhunzawm zel.

Mipui ngaihdan lakna hnuhnung berah hian Donald Trump hian state pawimawh pahnih, Flo≠rida leh Pennsylvania-ah Hillary Clinton-i a lehpel a, mahse ram pum huap chuan Clinton-i hian hma a la hruai chhunzawm zel.

Quinnipiac University-in opinion poll a tihchhuah thar berah, Trump hian Florida state-ah 42-39 in hma a hruai a, Pennsylvania-ah 43-41 in hma a hruai bawk. Thla hmasaa mipui ngaihdan lakah khan Clinton-i hian Florida-ah 47-39 leh Pennsylvania-ah 42-41 in hma a hruai a ni.

Donald Trump chuan a vice president nominee tur chu vawiin hian puan a tum. Nilani khan vice president tur atana a chhawpchhuahte hi a kawm kual a, hemi hnu hian thutlukna siamin, vawiinah a thu≠tlukna hi a puang dawn a ni. Trump hian politics lamah hnuhma a la neih loh avangin a vice President nominee tura a thlan hian inthlan hunah pawh a tan awmzia a nei pha dawn hle nia sawi a ni.