Germany thlawhtheihna tlaah dam chhuak awm lo
Thawhlehniaa France rama tla, Germanwings thlawhtheihna, Airbus A320-a chuang mi 150 zingah dam khawchhuak an awm lo. He thlawhtheihna hi Digne-Les-Bail bula Alp tlang chhengchhe laiah a tla a ni.
Thlawhtheihna chetsual chhan hi hriatchian a la ni lo a, mahse France Interior Minister Bernard Cazeneuve chuan thlawhtheihna black box pakhat hmuh a ni tawh a, a dang pakhat hmuh a nih hunah a chetsual chhan hi hriatchhuah theih beisei a ni.
Alps tlanga tlawhtheihna tlakna hmun hi tlang chhengchhe tak leh vurin a khuh a ni a, hei vang hian chhanchhuah hna thawh pawh a hautak hle.
Germanwings chuan Flight 4U9525 hi Barcelona, Spain aṭanga Dusseldorf, Germany pana thlawk a nih thu a sawi a, thlawhtheihna khalhtu pilot pawh hi kum 10 zet tawnhriat lo nei tawh niin, Airbus hi darkar 6,000 a khalh tawh tih a sawi.
Germanwings executive Thomas Winkelmann chuan French radar-in aircraft hi manin, air traffic controller-te chhinchhiah danin GMT 19.53 am khan feet 6,000 vela sanga thlawkin a bir thla thut a, mahse radar hian a man zui thei ta lo a, a hnu lawkah a tla zui ta a ni, a ti. He thlawhtheihna hi tihdan phunga endik hna pawh Lufthansa Tehcnik-in a nei vek a, thil fel lo a awm lo niin a tarlang.
Thlawhtheihna chetsual hma hian pui tura ngenna thu pawh engmah siam a ni lo. Airbus320 chesuala chuang zingah hian Germany mi 67, Spain mi 45, Belgium mi pakhat, Australia mi pahnih an chuang tih hriat a ni tawh. Britain mi pawh an awm a, mahse engzat nge tih hriat chian a la ni lo.
Airbus A320 hi khawvela passenger jet hman lar zinga mi leh him bera ngaih a ni. Aviation Safety Network data-a tarlan danin, Thawhlehniaa Airbus chetsualna thlenga thi an tam ber pathumna a ni a, kum 2007 khan Brazil runway-a TAM Linhas Aereas A320 chesualah mi 187 an thi a, hemi kum vek hian Indonesia AirAsia jet chu Java Sea-ah tlain mi 162 an thi bawk.
Germanwing thlawhtheihna hi kum 24-a upa a ni tawh a, a engine hi General Electric leh France rama Safran-te thawkdun, CFM Internation-in a siam a ni.