Australia-in IS zawm tumte a dang

Australia police-te chuan Islamic State (IS) firfiak pawl zawm tum nia rinhlelh, mi 200 chuang zet chu nikum August thla aṭang khan an ram chhuahsan phal loin an dang tawh.

Official-te chuan tun hnaiah Sydney airport aṭangin tleirawl pahnih, IS zawm tum nia hriat chu a thlawhchhuah an remti lo tih an sawi.

Immigration Minister Peter Dutton chuan Australia mite zingah IS pawl zawm tum an awm zel tih a sawi a, hei vang hian August thla aṭang khan international airport pariat-ah special anti-terror team dah an ni, a ti. Anti-terror unit-te hian an duty ṭan aṭangin airport leh a chheh­velah mi 85,000 zet chu thu an zawtfiah tawh a ni.

Australia sorkar chuan an ram mi 90 vel chu Iraq leh Syria-ah kalin IS pawl hi an zawm tawh niin a sawi a, an zinga mi 20 chu inbeihnaah an thi tawh a ni.

An mite'n firfiak pawl an zawm tur venna atan Australia sorkar chuan dan khauh tak a siam a, phalna leh chhuanlam fel tak nei loa IS kuta awm mek, Iraq-a Mosul leh Raqqa khua tlawh chu pawikhawihna lian tak anga ngaih a ni a, heng khawpuia zin luite chu kum 10 thleng lung-in tantir theih an ni ang.