Singapore PM hlui Lee-a kuang Parliament House-ah an sawn

Singapore Prime Minister hmasa ber leh modern Singapore dintu, Lee Kuan Yew chu Thawhṭanni zing khan a thi a, Pathianni-ah ram chawimawina famkim nen vui a ni ang.

PM hlui ruang hi Istana ground-a a chenna in, Sri Temasek-ah lak a ni a, mahse nimin khan mi tam zawkin an thlah theihna atan a kuang hi Parliament House-ah sawn a ni a, Inrinni thleng dah a ni ang.

Istana Plaza-a a ruang dah a nih lai hian Singapore President Toney Tan Keng Yam leh Emeritus Senior Minister Goh Chok bakah, President Office leh Prime Minister Office-a staff 90-te'n zahna an hlan.

Parliament House pana Lee Kuan Yew-a phurh a nih lai hian kawng lakah mipui tam takin an hmuak a, Instana ground-a a chenna in aṭanga lakchhuah a nih dawn hian SAF Military Police Command-a 24 Ceremonial Guard-te chuan main gate-ah zahna an hlan a ni. Istana leh Parliament House inkarah mi tam takin an lo thlir bawk.

Lee-a ruang a thlen hma pawh mi tam tak chu a kuang chunga zahna hlan tumin Parliament House-ah an lo pungkhawm tawh a ni.