US mipui 5% in Covid-19 kai tawh

Khawvela hripui leng mek, Covid-19 hri kai tamna leh thihpui tamna ber ram, US-ah chuan hri kai hi maktaduai 17 dawn an tling tawh a, an ram mipui zinga 5%  in he hri hi an kai tawh. 

Department of Health and Human Services-in a tarlan danin, hri kai zinga mi 1,13,000 vel chu damdawi-inah enkawl mek an ni. US-ah chuan thla khat chuang zet hri kai hi nasa takin an pung chho leh tawh a ni. 

Pfizer Inc/ BioNTech Covid-19 vaccine pek chhuah ṭan a ni tawh a, tunkar chhung hian dose maktaduai 2.9 vel an dawn theih an beisei. Vaccine hi frontline healthcare worker leh official ṭhenkhatte bakah, hri kai theih hlauhawm zual, a bikin kum upa lamte pek hmasak an ni ang. 

US Centers for Disease Control and Prevention (CDC) director, Dr Robert Redfield chuan mipui nawlpuiten vaccine an dawn theih hmain, hri kai hi an pun chak chhoh zel chuan an ram healthcare system dinhmun a chhiat hman hle a hlauhthawnawm thu a sawi. 

University of Washington-a Institute for Health Metrics and Evaluation chuan America mipuite hri darh tur venna atana kaihhruaina siam, hmaituamna vuah leh social distancing dan chu an vawn ṭhat viau loh chuan nakkum March 1-ah chuan hripui vanga thi hi mi 4,50,000 an tling thei dawn niin a lo tarlang tawh bawk. 

United Kingdom-ah chuan Pfizer/BioNTech Covid-19 vaccine pek chhuah ṭan a ni tawh a, vaccine pek chhuah kar hmasa berah mi 1,37,897 chuan he vaccine hi an la tawh. UK hi mipui hman tura Pfizer/BioNTech Covid-19 vaccine pawm hmasa ber ram a ni. 

Junior minister Nadhim Zahawi chuan vaccination programme chu ṭha taka kalpui mek a ni tih sawiin, ni sarih chhungin England-ah mi 1,08,000, Wales-ah 7,897, Northern Ireland-ah 4,000 leh Scotland-ah mi 18,000 hnenah pek a ni tawh a ni, a ti. 

Khawvela mihring cheng tam ram palina, Indonesia ram chuan Covid-19 vaccine chu a thlawn vekin mipuite hnena sem a tum. 

President Joko Widodo chuan coronavirus vaccine chu a thlawnin sem a ni dawn tih sawiin, mipuiten vaccine hi a him tawk tih an rin ngamna turin amah chuan a la hmasa ber dawn tih a sawi bawk. 

Tun thla tir lam khan China-a Sinovac Biotech vaccine siam dose matkaduai 1.2 chu an chah theng tawh a, mahse food and drug agency lam aṭangin he vaccine hi emergency atana hman phalna an la  nghak mek a ni. Nakkum January thla tir lamah vaccine dose maktaduai 1.8 a thlen belh leh ang. 

World Health Organisation (WHO) chuan Europe mipuite chu Krismas vuakveta chhungkua inhmuhkhawmnaah pawh hmai tuamna hmang ṭha turin a ngen a, kum 2021 kumtir lamah Covid-19 hri leng chu a hluar chho leh hle a hlauhthawnawm thu a sawi. 

UN agency chuan mipuite chuan an ngenna chu ngai pawimawh a, holiday chhoah a hma aia fimkhur zual turin a ngen a ni. A theih hram chuan Krismas lawmna pawh pawn lama nei hram tur leh,  heng hunah pawh physical distancing dan chu zawm a, hmaituamna hmang reng turina chah.

Europe member ram 27-te chuan vaccine semchhuah hun hi a ruala kalpui an tum niin European Commission chief Urusla von der Leyen chuan a sawi. Von der Leyen chuan hripui leng mek dang chat tur chuan mipui 70% tal vaccine pek a ngai dawn tih sawiin, hei hi hna hautak tak tur a ni tih a sawi. Karleh lamah European Medicines Agency chuan special meeting neiin, Pfizer/BioNTech vaccine pawm dan tur chungchang an sawiho ang. 

WHO chuan international expert team chuan Covid-19 hri lo chhuahna chhui kawnga pui turin nakkum January thlaah China-ah an kal dawn tih a sawi. 

Expert team-ah hian epidemiologist leh animal health specialist-te pawh an tel dawn a, January thlaah China hi an pan dawn tih WHO thupuangtu Hedinn Halldorsson chuan a sawichiang tawh. Covid-19 hri hi eng ramsa/ ransa aṭangin nge a lo chhuah tih an zirchiang dawn a ni. 

China pawhin expert team kal tur hi a lo lawm tih a sawi a, mahse Covid-19 hri hmuh ṭanna, Wuhan-ah an kal dawn em tih erawh sawichian a la ni lo a, WHO leh China lamte hian expert team-ten an hmun tlawh tur chungchangah an la inbe mek a ni. 

Britain-ah Covid-19 hri chi hrang a leng nia sawi chungchang chu chhui chian mek a nih thu WHO chuan a sawi a, chi thar nia sawi hi a  hmaa leng nen an inan lohna leh chi hrang a ni tih finfiahna a awm lo tih a sawi. 

Tun kar tir lam khan Britain health secretary Matt Hancock chuan an rama hri kai zinga 1,000 chuangah coronavirus hri chi dang, a chi thar hmuh a ni tih a sawi a, hei hi hri kai an pun chakna chhan pawh a ni thei niin a sawi. Hri chi thar an hmuh hi a hmaa mi aiin a ṭhang chak tih a lo sawi tawh bawk. 

John Hopkins Univeristy-in a tarlan danin, khawvel pumah Covid-19 kai  74,087,090 an awm tawh a, an zinga 1,646,687  in an thihpui tawh. Ni nga chhungin hri kai hi maktaduai 70 aṭangin maktaduai 74-ah an pung chho hman a ni. 

Hri kai tamna ber ram, US-ah chuan hri kai hmuh chhuah tawh hi mi 16,914,853 awmin 3,07,064 an thi tawh a ni. US dawtah India chu hri kai tamna a ni a, Brazil-in a dawt leh a ni. India aiin Brazil-ah hian hri thihpui an tam zawk. Brazil-ah hian mi 1,83,735 in Covid-19 vangin nunna an chan tawh. 

Russia, France, Turkey, Britain leh Italy-ahte hri kai hi maktaduai 1.8 chuang vek an awm tawh a; India, Mexico, Italy, Britain, France leh Iran-ah hri vanga thi hi 52,000 chuang an awm tawh bawk.