US President thar lakluh inkhawma tel tur US Congress panel-in a bithliah dawn

US Congressional commi­ttee chuan nakkum January 20-a US President thar atana Jo Biden lakluhna inkhawm buatsaihah tel thei zat tur chu a bithliah dawn tih a sawi. 

Joint Congressional Com­mi­ttee on Inaugural Cere­monies (JCCIC) chuan Washing­ton-a Capitol building-a President thar lakluhnaa tel tura sawmna hi Congress member tin leh an guest pakhat tan ṭheuh pek an ni dawn tih sawiin, Congress member te hnena sawmna an pek tur hi 1,070 a ni dawn tih a sawi. 

Committee chairman, Senator Roy Blunt chuan hemi chungchangah hian thuchhuah siamin, "JCCIC chuan public health and medical expert leh President Inaugural Committee nen ṭum eng emaw zat an sawiho a, khawvel pum leh US-a hripui leng mek, hri kai an pun chhoh zel avangin 59th Inaugural Ceremony neih tura tel tur hi a tlem thei anga  bithliah turin thutlukna harsa tak hi an siam a ni," a ti. 

Ṭum danga President thar lakluhnaah chuan ticket hi 2,00,000 vel semchhuah a ni a, Congress member-te pawh ticket ṭhahnem tak pek an ni ṭhin. 

Presidential Inaugural Committee chuan America mipuite chu President thar lakluh inkhawm neih turah a hmuna tel tum lo a, in lam aṭanga lo hmanpui turin a lo ngen tawh bawk a ni.