Gulf ramte'n beihpui an thlak

Tualchhung buaina tawk mek, Yemen President Abedrabbo Mansour Hadi-a'n Shiite helpawl an beihnaa pui tura a ngen angin Gulf ram ṭangrual, Arab Gulf Cooperation Council chuan nimin khan helho lakah beihpui an thlak nghal.

Saudi Arabia, Qatar, Kuwait, Bahrain leh UAE chuan Yemen President-in an ram leh mipuite venghim tura a ngenna chu tipuitlin ngei an tum thu an lo sawi tawh a ni.

Houti helhoin Yemen khawpui, Sanaa an thunun hnuah President Hadi hi tlanchhiain, chhim lama khawpui Aden-ah a awm mek a ni.

Gulf ram ṭangrualte hian Sanaa airport-a indo thlawhtheihna leh Dulaimi military airbase-te an bei a ni. US chuan Arab Gulf Cooperation Council in Houthi hel laka beihpui a thlak hi a thlawp thu a sawi. Beihpui thlakna atan hian Saudi Arabia chuan indo thlawhtheihna 100 bakah sipai 150,000 a tir nia sawi a ni.

US National Security Council thupuangtu, Bernadette Meehan chuan, "Yemen-a beihpui thlaknaah hian US sipaite chu tel ve lo mah se, a ṭul anga intelligence lama pui turin Saudi Arabia nen Joint Planning Cell kan din a ni," a ti.

Gulf ramte chuan Yemen sorkar dik tak a din leh theihna tur leh, a tla­chhe tur veng turin a ṭul angin an bei zel dawn tih an sawi.

Hetihlai hian Houthi Ansarullah politburo member, Mohammed al-Bukhaiti chuan, "Yemen mipuite chu an duh thlang turin an zalen a, Saudi Arabia leh Gulf ram sor­kar-te hian an thiltih hi an la inchhir ngei ang," a ti. Gulf ramte beihpui thlak chuan indona nasa zawk a chawk chhuak dawn niin an sawi bawk.