Airbus A320 tlaa chuangte ruang zawn chhunzawm

France ram, Alps tlanga Germanwings Airbus tlaa chuang, mi 150-te ruang zawn hna chu chhunzawm mek a ni. Thi zingah han school naupang 16 an tel.

Thawhlehnia Thlawh­theihna tla leh a chuangte ruang zawn hna hi helicopter eng emaw zat hmangin thawh mek a ni a, official-te chuan thlawhtheihna chetsual chhan hi an zirchiang mek bawk.

Thlawhtheihna hian a tlak hmain ṭanpui a ngaih thu engmah a thawn chhuak lo a, ground control aṭanga biakpawh an tumna pawh a thawktute hian an chhang lo a ni.

Tlang chhengchhe tak karah a tlak vangin a zawn hna pawh a hautak hle a, Nilaini khan cockpit voice recorder chu hmuh a ni tawh a, enfiah turin Paris-ah lak a ni. Voice recor­der enfiah aṭang hian thlawh­theihna pilot pa­hnih zinga pakhat cockpit aṭanga chhuak chu a lut leh thei tawh lo nia sawi a ni.

Investigator chuan, "Cockpit pawn lam aṭang­in kawngkhar chu kik a ni a, chhanna a awm loh avangin na zawkin a kik nawn leh a, mahse tumah­in an chhang lo. Hemi hnu hian kawngkhar tihchhiat a tum thawm pawh hriat tur a awm a ni," a ti. Pilot kal­chhuah chhan hi hriat a ni lo a, mahse an thil hriat theih chu thlawhtheihna chetsual hma lawk hian cockpit ah hian pilot pakhat zawk chu awmin, kawng­ka a hawng duh lo tih a nih thu a sawi.