Thla sample lain China Chang'e-5 mission a rawn let

China lunar mission, Chang'e-5 mission chu Thla(moon) lei leh lung sample nen nimin zing khan him takin khawvelah a rawn kir leh ta. 

Thla leilung sample phurtu spacecraft hi nimin zing, an ram huna zing dar 1:30 khan China ram hmar lam, Inner Mongolia-ah a rawn ṭum tih China National Space Administration (CNSA) chuan a sawi. 

Agency director, Zhang Kejian chuan an mission chu a hlawhtling hle tih a sawi. President Xi Jinping pawhin mission kalpuinaa inhnam­hnawih zawng zawngte lawm­puina a hlan nghal bawk. 

Chang'e-5 mission hi November thla tawp lam khan tirh chhuah a ni a, December 1 khan Thla hi a han thleng a ni. Hlawhtling taka a rawn let leh tak avangin China hi khawvela Thla leilung sample la thei ram pathumna a ni. Kum 1969 leh 1976-ah khan US leh Soviet Union chuan lunar mission hi hlawhtling takin an lo nei tawh a ni. 

Thla lei leh lung sample an han lak hi kg 2 vela rit a ni a, an dahna capsule hi Beijing-ah lain an hawng dawn a ni. Hemi  hnuah research team hnenah sample-te hi an zirchian turin pek a ni ang. 

Sample ṭhenkhat hi ram danga scientist-te pawhin an lo zirchian ve tura pek a ni dawn  niin Lunar Exploration and Space Program Center deputy director Pei Zhaoyu chuan a sawi.