Oct 7-a Israel beih a nih chungchangah US-in Hamas hruaitute thubuai siamsak
US chuan Palestinian firfiak pawl, Hamas hruaitu lu, Yahya Sinwar bakah an pawl hruaitu pawimawh dangte chu October 7, 2023-a Hamas in Israel a beih kaihhnawihah thubuai a siamsak.
Justice department chuan Hamas hruaitu parukte chu thubuai pasarih siamsak an ni tih sawiin, heng zingah hian US mi leh sa thata puhna te, firfiak pawl tana sum an pek leh, mipui beihna tura ralthuam an hman vangte a ni.
US law enforcement hian October 7-a Hamas te pawikhawihna thlen hnuah a mawhphurtu nia puhte laka thubuai a siamna hmasa ber a ni a, mahse hming an tarlan zinga pathum chu an thi tawh a, Sinwar pawh Gaza-a leiverh khawi emaw berah a biru mek nia rin a ni bawk.
Thawhlehnia video an tih chhuahah, US attorney general Merrick Garland chuan thubuai siamsakte chu America mi leh sate thahna leh US himna tiderthawng tura helpawl chetna sum thawhtu leh, kaihruaitute an ni, a ti. Anni hian Hamas-ten Israel ram tihchhiat a, civil mite an thahna turah pawh hma la tu an ni, tiin a sawi.
October 7-a Hamas-ten Israel an beihna chu Holocaust hnuah Juda mite suatna thleng rapthlak ber a ni tiin a tarlang a, "Kum upa zawk leh naupangte pawh an thliar chuang lo. Mipat hmeichhiatna lamah pawikhawihna lian tak thlenin pawngsual leh serh hlehsak te hial pawh an thlen a ni," a ti.
US-in Hamas hruaitu thubuai a siamsak zingah hian an pawl hruaitu hlui Ismail Haniyeh bakah, Hamas armed wing deputy leader Marwan Issa, Gaza leh West Bank pawn lama an pawl kaihruaitu ber Khaled Mashaal te pawh an tel.
Hamas-ten October 7, 2023-a Israel an beih ṭum khan America khau leh tui 42 an thah bakah, 10 an man tel bawk. An mi hren zinga mi, US-Israeli Hersh Goldberg-Polin chu kar liam ta khan an that leh bawk. Garland chuan Hersh leh, Hamas-ten American mi leh sa an thahte zawng zawng chungchang chu an chhui chiang dawn tih a sawi bawk. Hamas hruaitute thubuai an siamsakah hian thiam loh chantir an nih chuan damchhung tantir emaw, thi tura an chungthu relsak emaw theih a ni ang.