
Russia-in missile hmangin Ukraine military academy a kap
Russia chuan Thawhlehni khan ballistic missile pahnih hmangin Ukraine military academy leh a bul hnaia awm hospital a kap a, mi 50 chuang an thi. Hliam tuar mi 200 chuang an awm bawk niin Ukraine official-te chuan an sawi.
Russia missile hian Ukraine ram laili lai, Poltava region-a Poltava Military Institute of Communications main building fuhin, in chhawng eng emaw zat a chim a ni. In chim hian mi tam tak a delh a ni. In ṭhenkhatah kangmei a chhuak zui bawk. Poltava governor, Filip Pronin chuan Russia beihna avang hian aparment building 10 a chhe vek tih a sawi a, an bial tan leh Ukraine ram pum tan chhiatna rapthlak tak a ni tiin, nimin aṭang khan mitthi sunna hun hi an hmang a, ni thum chhung an sun ang.
He thil thleng chungchangah hian Russia lam chuan sawi an la nei lo thung. Military acamedy a beihnaa thite hi sipai vek an ni nge, civil mi tel an awm tih pawh sawichian a ni lo.
Poltava hi Ukraine khawpui, Kyiv chhim chhak lam km 350 vela hlaa awm a ni, Kyiv leh Ukraine khawpui lian pahnihna, Russia ramri bula awm Kharkiv inkara awm a ni.
Russia-in a kah hma lawk hian Poltava-ah hian air-raid siren tih rik a ni a, mi tam tak chuan bomb laka himna tura an siam hmuna tlan chhiat an tum mek laiin beih an ni ta ani. Ukraine Defence Ministry chuan Russia rawn chet dan chu a nunrawn thlak hle a ni, a ti.