NKorea : Tuiliana thi an awm vangin official 30 ban

North Korea ram hotu lu ber, Kim Jong-un chuan an rama tuilian leh leimin vanga mi 1,000 chuang an thih chungchangah, heng chhiatna thlengte an dan theih loh vangin official 30-te a ban niin South Korea media-te chuan an tarlang.

South Korea Chosun TV-in a tarlan danin, tun hnaia tuilian vanga nunna chan tam tak an awm chungchangah, mawhphurtute chu hremna na tak pek an ni dawn tih a sawi. Heng official-te hi an hnaa inthlahdah leh eirua puh an ni a, thla liam ta khan an hna aṭang hian ban an ni tiin a sawi.

Official ban takte hi an hming leh nihna puanzar an ni lo a, mahse North Korean Central News Agency (KCNA) chuan kum 2019 aṭanga Chagang Province Provincial Party Committee secretary dinhmun chelhtu, Kang Bong-hoon chu Kim Jong-un an hruaitu a ban zingah a tel niin a tarlang a ni.

July thla khan North Korea hian ruahsur nasa tak avangin tuilian leh leimin an tuar a, chenna in 4,000 vel nghawngin, mi 15,000 chu hmun him lama an insaseng angai a ni. Kim ngei pawhin tuilenna hmunte hi a tlawh a, tuilian a thil tihchhiatte din thar lehna tur hian thla eng emaw zat a ngai dawn a ni. Hetih lai hian Kim chuan tuilian vanga mi tam takin nunna an chan nia sawi erawh chu thu dik lo niin a sawi thung a, heng thu dik lo hi an ṭhenawm, South Korea lamin an thehdarh leh, khawvel hmuhah North Korea hmel tih chhiat tuma a hmalakna niin a puh thung.