US Election : Debate topic turah Trump leh Biden inhnial
US President thlanna neih tura candidate, Republican Donald Trump leh Democrats Joe Biden-te chu October 22-a final debate an neih tura an topic tur chungchangah an inhnial.
President Donald Trump campaign chuan debate buai-puitute chuan topic-ah foreign policy dah tel loin, Democrats lam puih an tum niin a puh. Hetih lai hian Biden camp lam chuan Trump chuan coranovirus leng mek chungchanga a hmalakna zawhnate pumpelhna kawng a zawng niin a puh let bawk.
Candidate pahnihte hian tunkar Ningani hian final debate hi an nei dawn a, hemi huna an topic tur chu moderator leh NBC news correspondent Kristen Welker chuan a lo puang tawh a ni. Final debate-a topic tura an thlante chu - American families, race in America, climate change, national security leh leadership-te a ni.
Debate kalphung thar siam
Donald Trump leh Joe Biden-te hian debate an neih hmasa berah khan an thu sawi laite chu nasa taka in au buaiin, ṭawngkam mawi lo tak tak pawhin an inchhal bawk. Presidential debate neih tawha mumal lo ber nia sawi a ni hial a, an ram mipuite sawisel pawh a hlawh hle. Debate vawi hnihna, October 15-a neih tura tih erawh ṭhulh a ni.
Candidate pahnihte awmze nei loa an in auh buai avangin debate buaipuitu, Presidential Commission on Debates chuan kalphung thar an siam phah a, minute 90 chhung debate neih turah hian topic pakhat sawi nan minute 15 zel ruahman a ni a, candidate-ten an policy an sawina tur minute hnih chhung chu tihbuai an nih lohna turin a thusawitu ni lo zawk microphone pawh hemi chhung hian off sak a ni tawh ang. Minute hnih hnuah erawh chuan open discussion hun a ni tawh a, microphone off a ni lo ang.
November 3 hi inthlan hun ni mah se, a hmaa vote thlak lawk hi phal a ni a, mi maktaduai 30 dawnin vote hi an thlak lawk tawh a ni. Vote thlak lawk an tam
Expert-te chuan an rama hripui leng avangin vote thlak nia mipui tam tak pungkhawm tur pumpelh tumin vote thlak lawk hi an tam phah niin an sawi. Kum 2016 inthlanah kha chuan inthlan ni hmaa vote thlak lawk hi mi maktaduai ruk chauh an awm.
Kar hnih chauhin inthlan hun hi a dang tawh a, mipui ngaihdan lak hnuhnung berah chuan Biden hian Trump lakah hma a la hruai a, mahse a hmahruaiana erawh a tam tawh lo hle thung.