Biden-a'n cabinet member atan anpui kawp mi a ruat

US President-elect Joe Biden chuan a cabinet mem­ber turte a ruat chho zel a, transportation secretary atan mahni anpui kawp chi, mayor hlui Pete Buttigieg a ruat. 

Transporatation secretary atana President-elect in a ruatna hi US Senate-in a pawm­sak chuan, Buttigieg hi US chanchina cabinet post-a LGBTQ mi awm hmasa ber tur a ni ang. Biden hian depart­ment of energy hotu atan Michigan governor hlui Jennifer Granholm a ruat bawk. 

Biden hian a cabinet member-ah mi hrang hrang, huam zau thei ang dah a lo tiam tawh a, hei vang hian langsar taka mahni anpui kawp, Buttigieg pawh hi transportation secretary atan hian a ruat nia ngaih a ni. Hemi hma hian Indian American Neera Tanden chu budget department hotu atan a ruat a, hmeichhia zinga treasury secretary hmaas ber turin Janet Yellen a ruat bawk. 

Defence secretary atana African-American dah a nih vawi khatna turin Lloyd Austin a ruat a, Taiwanese-American Katherine Tai chu US Trade Representative atan ruatin, Latino ho zinga health leh homeland security hotu ni hmasa ber turin Xavier Becerra leh Alejandro Mayorkas-te a ruat  bawk a ni. 

US-a LBGTQ advocy lian ber, Human Rights Campaign president Alphonso David chuan Senate-in a nemnghet hunah Pete Buttigieg chu openly LGBTQ member zinga cabinet member ni thei hmasa ber niin, thil chhinchhiah tlak, lawm phu tak a ni dawn a ni, a ti. 

Buttigieg hi military inte­lligence officer hlui a ni a, kum 2014 khan Afghanistan-ah a lo awm tawh a ni. Harvard aṭangin a graduate e, Oxford University-ah Rhodes Scholar a ni tawh bawk.