UNICEF-in syringe maktaduai 500 chuang chhekkhawl dawn

United Nations Children's Fund (UNICEF) chuan Covid-19 vaccine peih fel a nih huna hman turin warehouse-ah syringe maktaduai 520 a lo chhekkhawl dawn tih a sawi. 

UN agency chuan khawvelin Covid-19 vaccine chu nghakhlel takin a nghak mek a, peihfel a nih hunah hman theih nghal a nih theihna turin ruahmanna a lo siam mek tih a sawi. Chumi atan chuan syringe, hriau leh hmanrawn dang a kaihhnawihte chu tun aṭangin a lo inchhek khawl lawk a ni, tiin a tarlang.

"Ram hrang hrangte chuan hun rei loteah  Covid-19 vaccine hi peih fel hman a nih an ring fur a, tunah hian clinic-ah trial hrang hrang neih mek a ni a, license-te leh thil dang a kaihhnawih peih fel theih a nih chuan khawvel chuan syringe a mamawhna a sang dawn hle a ni," a ti. 

Heng syringe tam tham tak leh box-te dahṭhatna tur hian Gavi, the Vaccine Alliance a thawhpui dawn a, anni hian a leina atana a sum sensote hi an pe dawn a ni. UNICEF hian syringe bakah a dahṭhatna tur safety box maktaduai 5 a lei dawn bawk a ni.  Box pakhatah hian syringe hi 100 zel dah theih a ni ang. 

UNICEF hian kumtinin khawvel ram tam takah naupangte tan vaccine sem ṭhinin, hemi atana hman tur syringe hi maktaduai 600-800 vel a supply tel ṭhin a ni. Covid-19 vaccine siam a nih hunah chuan mamawh zat hi a let thum vela  a pun rin a ni.