Iran leh Russia-in Covid-19 vaccine siam dun tum
Iran chuan an ramah Covid-19 vaccine siam chhuah a nih theih nan Russia nen an thawk dun dawn.
Kar liam ta Zirtawpni khan online hmangin Russia-a Iran ambassador leh Russian Direct Investment Fund-a CEO, Kirill Dmitriev chuan meeting an nei a, he meeting-ah hian ram pahnihten Covid-19 vaccine an siam chhuah dan tur an sawi dun tih Iran-a FARS news agency chuan a tarlang.
Iran Public Health Department head Ryadh Abdul-Amir chuan an ramah hri kai an pun zel thu sawiin, an rama health facility-ah indaih khawp lohna a thlen mek avangin hri vanga thi pawh an pun thu a sawi a, hengte avang hian hri tih damna tur vaccine siam an mamawh thu a sawi.
Kar liam ta Inrinni khan Iran-ah hian hri kai thar mi 1,894 an awm a, hri kai hmuh tawh hi 3,84,666 an tling a ni. Middle east region-a hri kai tamna ber ram a ni mek. Kar liam ta Inrinni vek khan darkar 24 chhungin hri vanga thi hi mi 110 an awm a, anni nen hian Iran-a Covid-19 vanga thi hi mi 22,154 an awm tawh a ni.
Hri kai leh thihpui hi tam mah se, hri kai enkawl dam tawh hi mi 3,32,131 an awm tawh a, hetih lai hian hri kai zingah dinhmun ṭha vak lo enkawl mek 3,708 an la awm.
Khawvel pumah hri kai pung zelCovid-19 hri leng mek chu khawvel pumah a kai an la pung zel a, nimin thleng kha hri kai hmuh tawh hi maktaduai 27 an chuang tawh a ni. An zingah maktaduai 19.2 chu enkawl dam an ni tawh a, hri vanga thi hi 8,84,028 an awm tawh a ni.
US chu hri kai tamna ber ram la ni chhunzawm zelin, hri vanga thi tamna ber a la ni bawk. US dawtah Brazil, India, Russia leh Peru-te chu hri kai tam zualna ram panga zingah an tel.