Singapore PM hlui vui liam a ni

Singapore Prime Minister hmasa ber Lee Kyan Yew vuina inkhawm chu nimin khan neih a ni. Lee hi kar kalta Thawhṭanni khan kum 91 mi niin a thi.

Kar kalta Nilaini aṭang khan PM hlui ruang hi Parliament House-ah dah a ni a, hemi chhung hian zahna hlan turin mipui tam takin an tlawh a ni. Parliament House-a a ruang dah a nih chhung hian mi maktaduai khat velin an tlawh hman a ni.

Nimin khan Lee-a kuang hi Parliament House aṭang hian lak­chhuah a ni a, dar 1.30 khan cultural centre-ah a vuina inkhawm neih a ni. PM hlui kuang hi cultural centre panpui a nih lai hian ruahsur hnuaiah mi tam takin kawngah an lo hmuak a ni.

Vuina inkhawmah hian ram dang hruaitu eng emaw zat an tel a, an zingah hian US President hlui Bill Clinton, India Prime Minister Narendra Modi, Indonesia President Joko Widodo, Japan Prime Minister Shinzo Abe, Australia Prime Minister Tony Abbott leh UK House of Commons leader William Hague-te an tel.

Singapore Prime Minis­ter hlui, Lee-a fapa Lee Hsien Yang chuan kumina Singapore-in a kum 50-na a hman tur chu hmun hman loin a pa chu liam mah se, a hnathawh ropui tak rah hmu hmana a dam chu an chhuang hle tih a sawi. Lee Kuan Yew hi kum 31 chhung Singapore PM niin, Singapore dintua ngaih a ni. Kum 1991 khan PM a nihna aṭangin a bang a, a ban hnua pawh politics-ah nghawng lian tak a la nei zui reng a, Singapore mipui­te an ngaisang hle a ni.

Kum 2010-a New York Times-in a kawmnaah, Lee chuan, "Ka thiltih zawng zawng kha a dik vek ka ti lo a, mahse ka thiltihte kha tum ṭha tak nei veka ti ka ni," a ti.