Yemen hel laka beihpui thlaknaah mi 39 an thi
Saudi Arabia kaih-hruaia Arab ramte'n Yemen hel laka beihpui an thlaknaah civil mi 39 an thi tel.
Yemen President Abedrabbo Mansour Hadi-a ngenna angin Gulf ramte hian Yemen-a Houthi helpawl lakah beihpui an thlak a ni. Yemen-a inbeihna thleng vang hian khawvel pumah crude oil man pawh a sang nghal a ni.
Arab ṭangrual sipaite hian indo thlawhtheihna hmangin Inrinni khan Yemen khawpui, Sanaa an bei leh a, ni li chhung an beihna a ni. Sanaa hi nikum September thla aṭang khan Houthi te kutah hian a awm tawh a ni. Ṭangrual sipaite hian Sanaa khawpui chhim lama helpawlte camp leh, al-Hodayda khawpuia air defence base te an kap fuh a ni.
Inrinni vek khan Egypt-a Sharm El-Sheikh khawpuiah 26th Arab League Summit neih a ni a, hetah hian Yemen President Hadi chuan thu sawiin, Arab ṭangrual sipaite chu Houthi helho an tlawm a, an inpek hma chu bei chhunzawm zel turin a ngen.
Yemen-a beihpui thlak a nih hnu hian Inrinni zan khan Saudia Arabia navy-te chuan Yemen rama ramdang palai awm eng emaw zat leh, United Nations staff-te chu lawngin an hruaichhuak. Ade khua aṭangin lawngchawlhna hmunpui, Jessah-ah ramdang palai 68 leh Saudi Arabia mite hruai an ni tawh.