Thlipui tlehna hmun NKorea hotu Kim-a'n tlawh

North Korea hotupa Kim Jong Un chuan kar liam ta Inrinni khan an ram tuipui kama thlipui, typhoon Maysak tuarte a tlawh tih an ram television, Korean Central Television (KRT) chuan a tarlang.

Thlipui tuarte a tlawh bakah hian North Korean official meeting-naah a tel niin KRT chuan a tarlang bawk. Kim-a'n thlipui tlehna hmun a tlawh lai video hi KRT chuan a tichhuak a ni. 

Kar hmasa khan east China sea leh a chheh velah thlipui hi a tleh a, Korean Central News Agency (KCNA)-in a tarlan dan chuan Hamgyong province chhim leh hmar a tuipui kama chengte chu thlipui hian a nuai nasa a, chenna in 1,000 chuang zet chu  a nuai chhia a ni. Mahse thlipui tlehin chhiatna a thlena thi leh hliam awm zat erawh a tarlang lo. 

North Korea chanchinbu pakhat Rodong Sinmun chuan thlipui tleh vang hian Hamgyong province chhim lamah leh Kangwon province-ah inhliam an awm thu a tarlang a, Kangwon province-a chhiatna thleng erawh sawisel a hlawh hle a, he province-a thuneitute chuan an huam china chengte himna tur an ngaihtuah ṭha tawk lo niin Rodong Sinmun chanchinbu chuan a tarlang.

Heng chhiatna thlenna hmuna Kim awmlai hi  Nkorea media KRT chuan a tarlang a, inhliam awmna hmun Hamgyong province (chhim)-a chairman pawh hma a lak ṭhat loh avangin Kim chuan a ban a, a aiawh a mi dang a ruat thar nghal niin KCNA chuan a tarlang bawk. Province-a thuneitu hma la ṭha lote chu North Korea sorkar chuan hrem a tum. 

Typhoon Maysak tho hian kar liam ta Ningani khan South Korea ram a lo nuai tawh bawka, tui lian pawh a thleng bawk. Hriat theih chinah mi pahnih an thi a, mi 1000 chuangin power supply an nei lo zui bawk a ni. 

Vawin hian Typhoon Maysak chuan South Korea chhim lam a nuai rin a nih thu South Korea Meteorological Administration chuan a tarlang.