Japan rorellai party member-ten inthlan neih hma an duh

Japan prime minister aṭanga Shinzo Abe a ban hnuah a thlaktu tur chu Sep­tember 16 hian thlan a ni dawn a, hetih lai hian rorellai party lam chuan PM thar hian inthlanpui buatsaih thuai se an duh thu an sawi. 

Rorellai Liberal Demo­cratic Party (LDP)-a senior member, General Council chief Shunichi Suzuki chuan PM atana thlan thar hian cabinet a siam veleh Parliament lower house ṭhiat a, inthlanpui neihna tur buatsaih nghal turin a duh tih a sawi a ni. 

LDP hian September 14-ah an party hotu atana Abe thlaktu tur an thlang dawn a, hemi hnu September 16 hian Parliament-ah PM thar hi thlan a ni ang. 

PM thar chuh tum zingah Abe-a chief cabinet secretary, Yoshihide Suga chu hming langsar ber zingah a tel. Kum 71 mi, Suga hian ngun taka a inngaihtuah hnuah PM chuh hi a tum tih a sawi. Ani bakah hian defence minister hlui Shigeru Ishiba leh foreign minister hlui Fumio Kishida te pawhin PM dinhmun hi a chuh an tum.