Arab ramte'n tangrual sipai din an remti

Arab ram ṭangrualte'n Yemen-a Houthi hel lakah beihpui an thlak hnuah, Arab ram sipai ṭangrual pawl, joint force din an remti.

Egypt President Abdel-Fattah al-Sisi chuan Arab League (AL) member-te'n ram himna tiderthawng zawnga che te beilet turin joint Arab military force din an remtih thu a sawi.

Inrinni leh Pathianni khan Egypt-a Sharm el-Sheikh khawpuiah 26th Arab Summit neih a ni a, hetah hian Arab ram hrang hrang aṭangin lal leh president 20 an tel. He summit hian thu­tlukna hi an siam a ni.

Sisi chuan joint military force din a nihna tura a ṭul anga hma la a, zirchiannate lo nei turin participant rama chief of staff-te telna high-level team din a ni dawn tih a sawi.

Joint military force din hi Egypt President Sisi-a rawt a ni a, Arab ramte'n beihna an tawh fo avang te, ram himna tiderthawng thei thil a thlen fo avang tein ṭang­rual sipai din hi a ṭul tawh niin a ngai a ni.

Arab foreign minister-te chuan draft siamin, "Joint military force chuan member rama himna tiderthawng thei thil thlengte chu harsatna tawktuin a ngen a nih chuan an bei let nghal zel dawn a ni," an ti.

AL Secretary-General Nabil al-Araby chuan Arab ram hrang hrangah tualchhung buaina a thlen fo avangin ṭangrual sipai din tur hian hmanhmawh taka thutlukna siam a ngai a ni, a ti.

Kum 1950 khan AL member ramte chuan Joint Arab Defence and Economic Cooperation Treaty an lo ziak tawh a, he inremna hi Israel-in a ram a zauh belh zel tur lo danna atana an tih a ni. Mahse inremna hi a taka kalpui a ni lo.

Yemen-a Houthi helte hian nikum September thla khan an ram khawpui, Sanaa an la tawh a, President pawh kumin kumtir lam khan chhim lama Aden khawpuiah a tlanchhe tawh a ni. Hemi hnu hian helho hian hma an sawn zel avangin Saudi Arabia-ah a tlanchhe leh a, Inrinni khan Egypt-a summit neihnaah pawh a tel a ni.