Tunisia-ah firfiak duh lohna kawngzawh huaihawt

Tunisia khawpui, Tunis-ah Pathianni khan an rama firfiaka chetna thleng duh lohna lantirin kawngzawh huaihawt a ni.

Mipui pungkhawmte hian Tunisia chu ram ralmuang leh zalen a ni a, firfiaka chetna a thlen an remti lo tih an sawi. Tunis-a Bardo Museum panin kawng hi an zawh a, museum-ah hian firfiak kuta thite hriatrengna siam a ni.

March 18 khan fir­fiakte'n Tunis-a Bardo Mu­seum hi an bei a, ramdang mi khualzin 21 leh Tunisia mi pakhat an that a ni. Ramdang mi an thahte hi Britain, Japan, France, Italy leh Colombia mite an ni.

Museum-a hriatrengna inkhawm buatsaihah hian France President Francois Hollande bakah Italy Prime Minister Matteo Renzi leh ramdang palai eng emaw zat an tel.

Kawngzawh huai­hawt hi lefist pawl ṭhen­khat chuan an boycott a, kawngzawhnaah Islamist party an tel ve vang tih sawiin, Islamist party chu an rama Islam firfiak hluar chhanah an puh.

Tunisia sorkar chuan museum beitu mi pakua zinga pakhat nia hriat, Lokman Abu Sakhra chu kar kalta Inrinni khan sipate'n an kaphlum tih a sawi. Sorkar thupuangtu chuan an mi man hi museum beihnaa a hotu ber leh, Tunisia rama firfiak hlauhawm ber zinga mi a nih thu a sawi.