Turkey sorkar paihthlak tumna hlawhchham

Sipai chakna hmanga Turkey President Recep Tayyip Erdogan-a kaihhruai sorkar paihthlak tumna chu a hlawhchham.

Kar kalta Zirtawpni zan khan Turkey sipai hlawm khat chuan sorkar paihthlak tum hian an bei a, mahse an paihthla zo ta lo a ni. Sipaite hi ralthuam nen khawlaiah chhuakin, an ram khawpui Ankara leh Istanbul kawngpui te an dang a, khawpui chhung hmun ṭhenkhat chu air force hlawhtheihna hmangin an bomb a, Parliament building an bomb bawk. Sipaite hian President Erdogan-a kaihhruai sorkar chu paihthlak a ni tih an puang a ni.

Sorkar paihthlak a nih thu an puan hnu hian sipai helte hian curfew an puang zui bawk a, an rama thuneitute ber chu sipaite an ni thu an sawi a ni.

Sipai helten sorkar paihthlak tuma an beih lai hian President Erdogan hi chhim thlang lam, Marmaris khuaa chawlh hmanga a kal lai a ni a, sipaite chet dan a hriat veleh hian an ram mipuite tan thuchah a tichhuak nghal a ni. Presidenty Erdogan chuan an ram mipuite chu sorkar paihthlak tumtute chu bei let turin a chah a, hemi hnu hian sorkar paihthlak duhlotu leh sorkar thlawptu sipaite chuan an bei let nghal a ni. An inbeihnaah hian civil mi 161 leh sorkar paihthlak tuma beitu mi 104 an thi a, mi 1,440 velin hliam an tuar bawk. Sorkar paihthlak tumnaa inhnamhnawih sipai 3,000 dawn man niin, judge 2,700 ban an ni tawh bawk.

Turkey President chuan sorkar paihthlak tuma beihnaah hian sipaite fuihpawrhtu leh mawhphurtu berah Tukish Islamic scholar, Pennsylvania, US-a cheng mek Fethullah Gulen a puh a, US hnenah Gulen hi Turkey ramah thawn turin a ngen nawn leh nghal a ni. Turkey sorkar chuan Gulen Movement hian rorelna hran dinin, Turkey sorkar paihthlak a tum reng a ni, a ti. President chuan Guylen Movement enkawl school hrang hrangah an fate kal tir lo turin a chah a ni. Mahse Gulen hian sorkar paihthlak tumnaah hian inhnamhnawihna a neih loh thu leh, sipaite chet dan chu a dem thu a sawi thung.

Ram hrang hrang hruaitute chuan Turkey sorkar paihthlak tuma beihna chu an dem thu leh, Turkey sorkar an thlawp thu an sawi.

Italy foreign minister Paolo Gentiloni chuan Turkey thuneitute chuan an theihtawpa dan kengkawh tur te, mipuite dikna chanvo humhalh sak leh, parliament zahawmna chawinung tura an beih a ngai a ni, a ti. Sorkar paihthlak tumte sorkarin a hneh thei chu lawmawm a tih thu a sawi bawk.

Germany Chancellor Angela Merkel pawhin sorkar paihthlak tuma beihna chu a dem thu a sawi a, mipuiten an aiawha rorel tura an thlan chhuahte chu zah tur a ni, a ti. Sorkar paihthlak tum vanga inbeihna thlenga mi tam takin nunna an chan chu a lungchhiatthlak hle a ni, a ti. Turkey rama democracy humhim tuma beitute chu Germany chuan a thlawp zel dawn tih a sawi.

European Union foreign affairs hotu, Federica Mogherini pawhin Turkey sorkar paihthlak tumna a hlawhchham chu lawmawm a tih thu a sawi.

US Secretary of State John Kerry chuan President Erdogan-an sorkar paihthlak tuma beihnaa mawhphurtu bera a puh, Fethullah Gulen an rama thawn tura a ngenna chu ngaihtuah a ni dawn tih a sawi bawk. Hemirual hian Gulen-an thil tihsual a nei ngei a ni tih finfiahna rintlak tak Turkey sorkar chuan a pek a ngai dawn tih a sawi.

Palestinian firfiak pawl, Hamas chuan sorkar paihthlak tuma beihna an hneh theih avangin Turkey President Recep Tayypi Erdogan chu lawmpuina a hlan a, Hamas-te chuan Turkey hruai≠tuin Palestinian mipuite a thlawpna leh a puihna chu an hre reng a ni, a ti. Hamas thlawptute hian Gaza Strip-ah Turkey sorkar paihthlak tuma beihna a hlawhchham avang hian lawmin kawng an zawh a ni.

Britain foreign secretary, Boris Johnson pawhin Turkey foreign minister Mevlut Cavusoglu biain, Turkey rama mipui thlan sorkar an thlawp thu a hrilh niin a sawi. British Airways hian Inrini khan Turkey rama flight lut leh chhuak zawng zawng a cancel nghal bawk.